НОВИ САД – Нєвладово орґанизациї реґистровани у Войводини ше по 1. марец можу приявиц на Конкурс Покраїнского секретарияту за науку и технолоґийни розвой за софинансованє програмох и проєктох у обласци науки и технолоґийного розвою у АП Войводини.
Условиє же би нєвладово орґанизациї були реґистровани найпознєйше по конєц 2014. року, а програми и проєкти з хторима можу конкуровац за средства треба же би ше одношели на обезпечованє условийох за популаризованє и дзвиганє квалитету науково-виглєдовацкей роботи и технолоґийного розвою, на софинансованє медзиреґионалних и медзинародних сходох у обласци науки и технолоґийного розвою и друге.
Тиж так, буду потримани и проєкти за софинансованє орґанизованя сходох, трибинох, семинарох хтори доприноша розвою науки и технолоґийного розвою, як и проєкти за софинансованє публикованя моноґрафийох, часописох, електронских публикацийох, специялно дизайнованих интернет-презентацийох, хтори доприноша популаризованю и розвою тей обласци.
Формулар за приявйованє, як и вецей информациї, мож видзиц на интернет- презентациї Покраїнского секретарияту на науку и технолоґийни розвой, а мож их достац и на числа телефонох – 021/487-45-75, лєбо на е-адреси aleksandar.mihajlov@vojvodina.gov.rs