РУСКИ КЕРЕСТУР – По конкурсу за софинансованє проєктох з обласци явного информованя на язикох националних меншинох Министерства култури и информованя, Руска матка того року достанє 430 000 динари за проєкт „Глашнїк Рускей матки „Руснак””, гварене на вчерайшей схадзки Управного одбору того здруженя и редакцийного одбору „Руснака”.
По проєкту предвидзене же того року буду публиковани штири числа „Руснака” и два додатки, а перше число видзе концом юлия, друге початком септембра, треце у другей половки октобра, а штварте концом рока.
Як узвичаєне, Руска матка по наших местох будзе орґанизовац промоциї глашнїка „Руснак”, часто у рамикох даяких збуваньох. На схадзки предложене же би ше з анґажованьом младих помали подмладзовало Руску матку, цо у наиходзацим периодзе будзе и поробене, през промоциї.