РУСКИ КЕРЕСТУР – Тогорочни Фестивал рускей култури „Червена ружа“ всоботу, 1. октобра почал з отвераньом вистави малюнкох Андєлки Античевич (дзивоцке Балащак) з Беркасова, хтори швеча такей нагоди, понеже кажди ма и окремни родолюбиви печац.
Виставу отворела Наташа Еделински Миколка з Беркасова, котра нащивительом представела уметнїцу – єй живот, початки у обласци уметносци и стили мальованя.
– Андєлка ма коло 50 малюнки „олєй на платну“ и ище численши миниятури робени з енкаустику, технїку зоз зогриваньом воскових фарбох. За „Ружу” вибрала 30 платна и енкаустики, а найчастейши им етно-мотиви и пейзажи. Єй малюнки ноша и окремни емотивни родолюбиви печац, бо як у живоце, так и на малюнкох, Андєлка пестує любов ґу руским кореньом – гварела Наташа Еделински Миколка.
Нащивительох з даскелїма словами привитала и сама авторка Андєлка Античевич и гварела же єй, як аматерки, гоч уж викладала на велїх виставох у жеми и иножемстве, мило же ма чесц буц часц такого значного фестивалу Руснацох. Як подзекованє орґанизатором, Андєлка домашнїм подаровала єден свой малюнок з окремнима рускима елементами.
(Вецей фотоґрафиї з вистави уж обявени у окремней ґалериї на правим боку сайту „Руского слова” и Рутенпресу).
