КУЛА/РУСКИ КЕРЕСТУР – Скупштина општини (СО) Кула вчера розришела двох членох Управного одбору (УО) Дому култури Руски Керестур скорей виходзеня мандату и место нїх меновала нових, а за окончователя длужносци директора (о.д.) Дому култури меновала Владимира Малацка з Руского Керестура.
На основи предкладаня своєй Комисиї за кадрово и административни питаня и роботни одношеня, СО з векшину гласох розришела длужносци дотерашнього предсидателя УО Дому култури Янка Николича (Йонея) и за предсидателя меновала Елемира Раца (Мика), а место дотерашнього члена Янка Мудрия, до УО меновала Илону (Геку) Зарубица. Шицки спомнути з Руского Керестура.
Розришени члени УО Дому култури до того цела на СО Кула були меновани 6. юлия того року, а на схадзки СО су розришени без толкованя.
У складзе зоз законскима предписанями, о менованю двох нових членох УО Дому култури СО глєдала предходне думанє од Националного совиту (НС) Руснацох, як и предходне думанє о менованю о.д. директора тей установи, алє на вчерайшей схадзки СО достати думаня од НС нє винєшени.
НС Руснацох од 26. децембра, та по 12 годзин 28. децембра отримал електронску схадзку, на хторей 12 члени Совиту, насампредз пре нєдостаток толкованя причинох за розришованє двох членох, дали „неґативне думанє о кандидатох за членох Управного одбору Дому култури”, док 7 члени Совиту нє гласали. На вимогу Совиту же би Скупштина дала толкованє причинох за розришенє, одвит нє достати.
На вчерайшей схадзки СО Кула Йоаким Рац Мими розришени длужносци директора керестурского Дому култури пре виходзенє мандату, а за о.д. директора меновани Владимир Малацко. Пред тим, 9. децембра, после явного конкурсу, на хтори конкуровали Рац и Малацко, УО Дому култури Раца вибрал за директора, медзитим, як поведзене у Заключеню Комисиї за кадрово и административни питаня и роботни одношеня СО, Комисия думаня же конкурс за вибор директора нє бул розписани у складзе зоз Законом о култури и Статутом Дому култури.
Конкурс за директора Дому култури обявени 20. новембра и спомнута комисия думаня же то нє було 60 днї пред виходзеньом мандату директора, понеже є на тоту функцию на СО меновани 31. децембра 2011. року, док ше УО Дому култури руководзел з тим же Рац контракт о роботи з УО подписал 16. януара 2012. року.
З тим Комисия нє прилапела предкладанє УО же би СО за директора тей установи вибрала Йоакима Раца и за о.д. директора, на период до шейсц мешаци, вчера меновала Владимира Малацка, а мандат му почина 1. януара 2016. року.
Национални совит Руснацох на спомнутей електронскей схадзки тиж з 12 гласами дал „неґативне думанє” о Малацкови як кандидатови за окончователя длужносци директора керестурского Дому култури предложеного з боку локалней самоуправи, понеже Совит на становску „же поступок за розписаованє явного конкурсу за вибор директора Дому култури бул у складзе зоз законскима предписанями”.
