СЕЧАНЬ – Рецитатор старшого возросту Мирослав Малацко з Руского Керестура вчера освоєл треце место на Покраїнскей смотри рецитаторох у Сечню, а попри нього, на Републичну смотру ше пласовала и Валентина Михняк з Дюрдьова.
Спрам пропозицийох, у каждим возросту ше вибера 18 побиднїкох, спомедзи нїх вец дзевецерих котри Войводину представяю на Републичней смотри, а спомдзи тих дзевецерох и троїх наградзених. Так, попри горе спомнутих, медзи 18 побиднїками и добитнїками Златней дипломи Покраїнскей смотри и Микола Еделински у младшим возросту, Тимеа Будински у штреднїм, обидвойо з Керестура, та Николета Недич з Коцура у старшим возросту.
На Покраїнскей смотри, хтора отримана од 24. по 26. април, участвовали прейґ 180 рецитаторе у трох возростох, а медзи нїма и дзевецеро з наших местох котри рецитую по руски. Попри спомнутих котри медзи побиднїками, участвовали и Милица Михальовски з Дюрдьова и Минеа Югас з Руского Керестура у младшим, та Марко Недич з Коцура и Желько Виславски з Керестура у штреднїм возросту.
Рецитаторох за змаганє пририхтали Ивана Дудаш и Мелания Рамач у Керестуре, Мария Самарджич и Яким Гарди у Дюрдьове и Весна Дїлас у Коцуре, а през три днї их оценьовал фахови жири у хторим було ґлумец Миодраґ Патрович, професорки Катарина Челикович и Катарина Петрик, писатель Нику Чобану, новинар Михайло Зазуляк, педаґоґ Мелинда Ладишич и драмски уметнїк Ана Лесковац.
Покраїнску смотру рецитаторох орґанизовали Завод за културу Войводини и Образовно-кулурни центер Сечань, а з финансийну потримовку Покраїнского секретариту за културу и явне информованє и Општини Сечань.
Републична смотра рецитаторох ма буц отримана 15. мая у Валєве.