ЖАБЕЛЬ – Явне подприємство „Розвой” зоз Жаблю утвердзело оперативни план роботи жимскей по 31. марец идуцого року, хтори облапя шицки штири места у жабельскей општини, а и того року општински драги од шнїгу будзе чисциц ДОО „Копово” зоз Жаблю.
Препатрена шицка механїзация, а шнїг ше будзе розгартац з плугом поставеним на камион, з вецейнаменску комбиновану машину, та з трактором з плугом. На розполаганю буду и булдожери.
За драгу Л-7, од центру Жаблю по Тису, обезпечени 3 тони солї и 5 кубики ризли, а за драги у местох општини 3 тони солї. Наглашене и же гражданє длужни одруцовац шнїг опрез своїх обисцох.
За отримованє главних драгох Бечей-Шайкаш и Жабель-Темерин задлужене ЯП „Драги Сербиї”.