ДЮРДЬОВ – На схадзкох Управного одбору Културно-уметнїцкого дружтва „Тарас Шевченко” ше уж на велько пририхтує отримованє тогорочного, 23. Фестивалу жридлового шпиваня „Най ше нє забудзе”, котри будзе отримани на соботу, 22. авґуста. Поволанки за участвованє послати прешлого тижня.
Домашнї обчекую же ше приявя шицки нашо дружтва котри пестую жридлово шпиванє. Пропозициї за облєчиво и шпиванє остали исти – жени, дзивки и хлопи маю буц облєчени до руского народного шветочного облєчива, жени вивязани до фитюли або баршоню, а хлопи можу мац калап на глави. Наступ и далєй огранїчени на два шпиванки, єдна муши буц виведзена акапела.
Прияви за участвованє тирваю по нєдзелю, 12. авґуст, на имейл matka.djurdjov@gmail.com.
Окрем змагательней часци, на Фестивалу будзе и ревиялна часц у котрей буду участвовац госци, шпивацки ґрупи. Орґанизаторе з дюрдьовского Дружтва и того року планую тематску виставу у Рускей школи.
Фестивал жридлового шпиваня „Най ше нє забудзе” почнє на 20 годзин у дворе Основней школи „Йован Йованович Змай” у центре Дюрдьова, а у пополадньових годзинох, найвироятнєйше од 18 годзин будзе отворена тематска вистави у Рускей школи.