ЖДИНЯ (ПОЛЬСКА) – Од 17. по 19. юлий отримана 44. „Лемковска ватра”, найвекши и найзначнєйши лемковски фестивал у Европи и швеце.
Попри вельочислених домашнїх колективох, на фестивалу наступели и вецей иножемни фолклорни и музични ансамбли – з України, Словацкей и Сербиї. Програма тогорочного фестивала почала пияток, 17. юлия, з торжественим палєньом огня 44. „Лемковскей ватри”.
Всоботу, 18. юлия, було святочне покладанє квеца ґу мемориялному хресту на чесц жертвом насилного висельованя Лемкох зоз Польскей 1947. року, а тиж и шицким котри погинули од пошлїдкох воєней аґресиї Русийскей Федерациї на Україну. У тей святочносци участвовала и квеце ґу памятнїку положела и вецейчлена делеґация Союзу Руснацох Українцох Сербиї котру того року предводзел його предсидатель Боґдан Виславски.
Програма предлужена на главней бини, кед ушлїдзело привитованє високих церковних и политичних достоїнственїкох з Польскей и України и їх поздравни бешеди з тей нагоди, а тиж и уручованє наградох заслужним активистом з боку „Обєднаня Лемкох” у Польскей, главного орґанизатора фестивала.
После цалодньовей програми, фестивал предлужени до позних вечарших годзинох, чому допринєсла релативно красна хвиля и єдинствени амбиєнт у котрим ше фестивал отримує.
Внєдзелю, 19. юлия, у предполадньових годзинох, на Ватровим полю, отримана Архиєрейска служба Божа, котру служели троме грекокатолїцки владикове УГКЦ.
Исти дзень пополадню було зашеданє Предсидательства Шветовей федерациї українских лемковских орґанизацйох (СФУЛО), у чиєй роботи участвовала и делеґация Союзу Руснацох Українцох Сербиї, а котре зволал и водзел його подпредсидатель Боґдан Виславски. Бешедоване о активносцох членох-субєктох СФУЛО з України, Польскей, Канади и Сербиї у остатнїм периодзе и пририхтованю Конґресу СФУЛО з Виберанкову скупштину котра ма буц идуцого року.
На тогорочней 44. „Лемковскей ватри”, внєдзелю на законченю фестивала, барз успишно наступели и два нашо фолклорни состави – Руского културного центру Нови Сад и Дома култури Руски Керестур. Перше наступели новосадски фолклораше зоз хореоґрафиями Коломийка, По земплински и Ти шугаю, дует Марина Тодич и Клара Катрина одшпивали єдну шпиванку, а успишно ше як шпивачка представела и Наташа Тамаш. Керестурски ансамбл наступел з хореоґрафиями Березянка и Карички, чапаши и чардаши и одшпивали вецей шпиванки. Руководитель Виводзацкей фолклорней ґрупи Руского културного центра Нови Сад Владимир Иван Вева, а руководителє Фолклорного ансамблу Дома култури Руски Керестур Желько Ковач, Лариса Роман, Ивана Шомодї и Мирко Надь.
До Ждинї у Польскей новосадски и керестурски танєчнїки одпутовали у орґанизациї Союзу Руснацох Українцох Сербиї, партнерскей орґанизациї „Обєднаня Лемкох” у Польскей, котра традицийно главни орґанизатор того фестивала.
Фестивал закончени з торжественим гашеньом огня 44. „Лемковскей ватри” и обецунку же ше шицки заш стретню нарок, на истим месце и у истим амбиєнту.
