РУСКИ КЕРЕСТУР – Роботне цело за младеж Националного совиту Руснацох вчера у Руским Керестуре отримало свою штварту схадзку, на хторей преважно бешедоване о цильох того цела у 2016. року.
На схадзки присуствовали шейсц з 13 членох, а єдна особа схадзку провадзела и гласала електронски. Прилапени план роботи Роботного цела за младих за 2016. рок и финансийни план за идуци рок, хтори виробени на основи тогорочного, а виноши 350 000 динари.
Роботне цело будзе давац финансийну помоц за витвойованє проєктох, за цо опредзелї и найвецей средства зоз свойого буджету. Кед будзе розполагац з предвидзену суму од 350 000 динари, Роботне цело за проєкти видвої 250 000 динари, порадзене на схадзки.
У планє за 2016. рок и витворйованє одредзених змистох за младих у местох зоз значнєйшим числом Руснацох, за цо буду опредзелєни 30 000 динари. Як и у тим року, и надалєй плановане активне медзинародне сотруднїцтво з Руснацами звонка Сербиї, а єден з конкретних планох то представиц литературну, музичну и подобову творчосц младих з Войводини младим Руснацом у Горватскей.
На схадзки бешедоване и о наиходзацей нащиви до Вуковару, дзе на соботу, 19. децембра, у сотруднїцтве зоз Заводом за културу войводянских Руснацох, нашо млади представя дружтвени и културни активносци у наших местох.