РУСКИ КЕРЕСТУР – До молитвох и посту за преставанє воєних зраженьох у України, вчера ше придружели у Марийовим святилїщу Водици, а пред тим зоз процесию, вирни з Керестура и представителє наших парохийох з Нового Саду, Коцура, Кули и Вербасу зоз осем своїма священїками.
На молитву и пост вчера цалу Церкву поволал папа Франциск, и наш владика Георгий, а молитву у Водици иницировали шестри Служебнїци непорочней Дїви Мариї хтори и орґанизовали процесию.
Процесия почала з молитву у катедралней церкви хтору предводзел керестурски и новосадски парохове о. Владислав Варґа и о. Юлиян Рац, и капелан о. Михайло Шанта. О. Варґа здогаднул же подобни и масовни процесиї до Водици орґанизовали и нашо предки у найчежших историйних хвилькох.
Процесию очолєну зоз хрестом и икону водицовей Богородици, як и молитву пацеркох предводзели Шестри служебнїци, а у нєй участвовали коло пейдзешат особи, попри шестрох, спомнутих священїкох и єромонахи з Кули о. Дамян ЧСВВ и о. Платон ЧСВВ, и вирни рижних ґенерацийох.
У Водици процесию дочекали ище сто особи, медзи нїм и коцурски и старовербаски парох о. Рац и о. Гудак, предсидатель Националного совиту Руснацох и його Надпатраюцого одбору, члени домашнього Церковного одбору и други.
Священїки о. Варґа, о. Ю. Рац, о. М. Шанта и о. В. Медєши у лєтнєй каплїци одслужели Молебен до Богородици, а преношени є и прейґ Фейсбук боку Катедрали.
На концу парох о. Варґа здогаднул на причину зоз хтору ше жертвено пришло ґу Водицовей Мариї, бо як на прикладох наглашел, кед ше з виру модлї и пребачує, Бог може меняц цек подїйох и историї.
У мено українского народу шицким присутним подзековала провинциялна шестра шестрох Служебнїцох ш. Мартина Кмита.