НОВИ САД – На схадзки Покраїнскей влади, хтора отримана пондзелок, 16. марца, прилапени предлоги о можлївих ришеньох за предлужованє финансованя вибудови Жежельового мосту у Новим Садзе, а хтори Покраїнска влада прешлїдзи до Министерства будовательства, транспорту и инфраструктури и Желєзнїцох Сербиї.
Понеже у финансованю проєкту вибудови Жежельового мосту участвує и Европска уния (ЕУ), предсидатель Покраїнскей влади Боян Пайтич ше стретнул зоз шефом Делеґациї ЕУ у Сербиї Майклом Девенпортом и представел му предлоги за предлуженє реализациї того проєкту.
Спомнути ришеня у ствари нариси контрактох о преносу средствох за финансованє того проєкту. Перши Предлог роботна верзия Нарису конктракту „Вибудов Жежельового мосту прейґ рики Дунай у Новим Садзе“ медзи Покраїну Войводину, Управу за капитални укладаня Войводини, Городом Нови Сад и Републику Сербию, односно Министерством будовательства, транспорту и инфраструктури. Други Предлог роботна верзия истого контракту, алє место Министерства будовательства, подписнїк би мало буц Акционерске дружтво Желєзнїци Сербиї.
Вибудов Жежельового мосту тирва длуго пре нєпорозуменя медзи инвеститорами и виводзачами роботох, а хтори ше одноша на финансиї. Понеже за вибудов мосту потребне вецей пенєжу як предвидзене, а по контрактох нє були предвидзени дополнююци средства, инвеститоре нє могли винайсц способ як пренєсц потребни пенєж и предлужиц финансованє того проєкту.