СРИМСКА МИТРОВИЦА – З нащиву Подручней канцелариї у Сримскей Митровици представителє Националного совиту (НС) Руснацох започали тогорочни циклус нащивох подручним канцеларийом у наших местох, пре спатранє поробеного у прешлим року, як и планох и активносцох у идуцим периодзе. Нащиви би мали буц закончени до конца априла.
У парохийним доме грекокатолїцкей церкви у Сримскей Митровици вчера, 22. марца, члени Подручней канцелариї (ПК) Националного совиту Руснацох (НС) у тим городзе ше стретли з предсидательом Вивершного одбору НС Жельком Ковачом и секретаром НС Таню Арва Планчак.
Бешедоване о активносцох Канцелариї у прешлим периодзе, як и о планох за наступни час, та можлївей финансийней потримовки од НС.
Домашнї госцом з НС винєсли же активносци ПК богати и же город уж досц добре упознал руску заєднїцу и єй роботу. Поведзене же, як и у других штредкох, єст почежкосци у зазбероаваню дзецох и младих, алє ше их на рижни способи и у цо векшим чишлє уключує до активносцох, насампредз през рижни роботнї, до пририхтованя програмох, як и на орґанизовани годзини руского язика.
До ПК вибрани двойо нови члени – Мирослав Бесерменї и Даниєла Горняк, котри и дотераз були активни у роботи Руснацох у Митровици, а винєшене и же членїца ПК Станислава Будишин задзековала на членстве.
На концу схадзки, на хторей присуствовал и сримскомитровицки парох о. Владислав Варґа, Желько Ковач ПК НС подаровал уметнїцки малюнок Владу Нярадия, а приял го координатор Канцелариї Зоран Бережни.