НОВИ САД – Наютре у Клубу аматерох у Руским културним центру у Новим Садзе на 13 годзин почнє роботня „Руска ґенеалоґийна база – перши крочай“ котру отрима Саша Сабадош.
На роботнї будзе розпатрена тема матичних кнїжкох як поняца, походзенє и локация матичних кнїжкох значних за виучованє историї Руснацох, а през роботню годно дознац о основних елементох значних за зберанє податкох содержаних у матичних кнїжкох и терминолоґия и совити значни при складаню фамелийного стебла.
Роботня ше реализує у рамикох проєкту Диґитализация найстарших церковних матичних кнїжкох грекокатолїцких церковних општинох як способ очуваня културного нашлїдства Руснацох у Сербиї хтори финансийно потримало Министерство култури и информованя на Конкурсу за финансованє лєбо софинансованє проєктох з обласци диґитализацї културного нашлїдства и сучасней творчосци у 2021. року.
Тот проєкт, як и саму роботню, реализує Завод за културу войводянских Руснацох.