РУСКИ КЕРЕСТУР – У Школи „Петро Кузмяк” нєшка виложени прелиминарни резултати Закончуюцого испиту, хтори 15, 16. и 17. юния покладали 54-еро школяре осмей класи.
Того року на тестох перши раз були шицки нєпознати задатки, а кажди тест мал 20 максимални боди. На тесту з руского язика школяре посцигли 6,96 просекове число бодох, а найвецей – 15 боди мала єдна школярка.
На тесту з математики посцигнуте 5,57 просекове число бодох, найвецей 15 боди мала єдна школярка, док на комбинованим тесту з пейц предметох (история, ґеоґрафия, физика, хемия и биолоґия), просеково посцигнути 9,21 бод. З того тесту найвецей, по 15,5 боди посцигли двоме школяре.
На прелиминарни резултати на ютре предвидзени термин за жалби, а конєчни резултати буду обявени 25. юния.
Лїстину жаданьох за упис до штреднїх школох школяре буду випольньовац 26. юния.