КУЛА – У ОШ „Петефи бриґада” у Кули пондзелок, 19. октобра, почала настава за основне образованє одроснутих („Друга шанса”), на хтору дотераз уписани коло 40 школяре до другого (5. и 6. класа) и трецого циклусу (7. и 8. класа), а до першого циклусу ище вше тирва упис, понеже, спрам предписаньох, нє уписани потребни 15 школяре. Заинтересовани котри жадаю закончиц основне образованє можу ше явиц андраґоґови Снежани Радоєвич на телефон Школи 723-944.
И того року уписани школяре-одроснути и з Руского Керестура, за тераз осмеро, а обчекує ше же их будзе и вецей. Як и за шицких з местох општини, и за Керестурцох орґанизовани превоз до школи у Кули и потребни материял за наставу.
На початку настави присутних привитали директорка Школи „Петефи бриґада” Ержебет Блашко и андраґоґ Снежана Радоєвич, котри им пожадали успих у школи и потолковали як будзе випатрац настава.
То уж штварти рок же у Кули орґанизована така настава, и дотераз 131 школяр достал свидоцтво о законченим єдним з трох циклусох, а 55-еро закончели треци циклус (7. и 8. класу ОШ).
„Петефи бриґада” медзи пейцома школами у Заходнобачким округу хтори з боку Министерства просвити верификовани за реализованє основного образованя одроснутих.