РУСКИ КЕРЕСТУР – На ноцним турнире у малим фодбалє у Руским Керестуре, ше ище вше бави по ґрупох, а кед хвиля дошлєбодзи, полуфинални и финални змаганя годни буц початком идуцого тижня.
Змаганя по ґрупох закончели лєм ветеранє, дзе по 9 боди маю „Червинка“ и „Русин 2“, 7 боди ма „Русин 1“, а найменєй – 4 боди ма „Искра“. У полуфиналу буду бавиц „Червинка“ процив „Искри“ и „Русин 1“ процив „Русину 2“.
У катеґориї сениорох єст аж 12 екипи и ту ище остало найвецей змаганя.
При пионирох тераз перши „Живоїн значи живот“, други „Васко де ґама“, треци „Лхн“, штварти „Бомбардерс“, а пияти „Два лїви“.
При младших пионирох водзи „Кула“, за ню „Искра“, потим „Клуб 10“ и „Kings of football“.
Тогорочни Ноцни турнир у малим фодбалє рекордни по чишлє учашнїкох, а и нащивеносц барз добра, бо ше кажди вечар преда коло 200 уходнїци.
Орґанизатор Ноцного турниру СД „Русин”.