СЕРБИЯ – На пияток, 11. новембра, державне швето Дзень примиря у Першей шветовей войни, а по Законє о державних и других шветох у Сербиї, 11. новембер нєроботни дзень.
Тото державне швето ше у нашей жеми преславює од 2012. року, як здогадованє на дзень капитулациї Нємецкей у Першей шветовей войни 1918. року. На тот дзень сили Антанти з Нємецку подписали примирє, з чим закончена Перша шветова война.
З примирйом теди закончени борбени дїйства, алє ище шейсц мешаци тирвали прегварки на Паризкей мировней конференциї, покля нє заключене и мировне спорозуменє – Версайски мир.
У Сербиї як амблем Дня примиря ше хаснує квет Наталийовей ремонди, загроженей файти у Сербиї, у бонатики познати и як феникс. Попри нього, у амблему и мотив пантлїки Албанскей памятнїци (над кветом), а препорука же би ше тот амблем ношело у тижню пред, як и на саме швето.