МИКЛОШЕВЦИ – На нєдзелю, 15. новембра, шветочно будзе означени вельки ювилей – 165-рочнїца доселєня Руснацох до Миклошевцох. Шветочносц почнє зоз Службу Божу у миклошевскей грекокатолїцкей церкв на 10,15 г., а потим на 13 г. будзе Шветочна схадзка з нагоди ювилею.
На Шветочней схадзки месних здруженьох домашнї обчекую и госцох – представительох Вуковарско-сримскей жупаниї, Општини Топмповци, руских здруженьох з Горватскей, представительох радох месних одборох Општини Томповци, як и госцох зоз Сербиї – представительох Национално совиту Руснацох и Дружтва за руски язик, литературу и културу.
На Шветочней схадзки будзе представена и Фотомоноґрафия Дюру Лїкара „Миклошевци под сримским нєбом”, а у музичней програми участвую домашнї шпиваче и госци з Петровцох и Вуковару.
После промоциї будзе отворена вистава старих готоґрафийох, хтору пририхтали членїци Активу женох, вєдно з учительку Ксених Лїкар. Попри тим, буду виложени и ручни роботи наших предкох, насампредз продукти з конопи, як и роботи з блїзшей прешлосци.
Шветочносц з нагоди ювилею приселєня орґанизує окремни Орґанизацийни одбор, а покровитель шветочносци жупан Вуковарско-сримскей жупаниї Божо Ґалич. Попри покровителя, друкованє Фотомоноґрафиї помогли Општина Томповци, Горватска матица виселєнцох, Општина Боґдановци и Рада рускей националней меншини Миклошевци.