НОВИ САД – У Медия центру РТВ на Мишелуку на стреду, 19. януара на 12 годзин, будзе отримана конференция за новинарох на котрей буду презентовани резултати виглєдовацкого проєкта о авторству скорей нєпознатих подобових роботох визначного сербского маляра Арсения Теодоровича (1767–1826) у Републики Горватскей, сообщела Новинарска асоцияция Руснацох (НАР).
Сотруднїцки тим НАР-у – музейни совитнїци Ґалериї Матици сербскей у пензиї мр Драґойла Живанов и Милена Врбашки, концом 2021. року закончел проєкт през котри документовал авторство Арсения Теодоровича потераз нєпознатого портрета крижевацкого владики Константина Станича котри ше находзи у Грекокатолїцким Семеништу у Заґребе (насловна фотоґрафия). Под час спомнутого виглєдовацкого проєкту утвердзени ище єден потераз нєпознати факт, а то авторство Арсения Теодоровича у мальованю першого иконостасу за грекокатолїцку катедралу у Крижевцох (Горватска), котри преселєни до церкви святого Юря у Стойдраґи, блїзко Самобору.
Проєкт „Подобови космополитизем у ґалериї портретох Крижевацкей епархиї – нєпозната робота Арсения Теодоровича“ потримали Покраїнски секретарият за образованє, предписаня и национални меншини-национални заєднїци, Завод за културу войводянских Руснацох и Явна медийна установа Радио-телевизия Войводини.
У 2022. року ше наполнює 255 роки як ше народзел Арсениє Теодорович, пише у сообщеню.