БЕОҐРАД – Центер за вигледованє ентицитету, у рамикох Мрежи за интеркултуралносц, на ютре у Беоґрадзе орґанизує Националну конференцию „Ґу политики интеґративней мултикултуралносци у Сербиї”. Конференция будзе на 12 г. у Медия центре, а поволани представителє националних совитох, явней управи, нєзависних державних орґанох, народни посланїки, представителє нєвладових и медзинародних орґанизацийох и фаховци.
На Конференциї будзе слова о резултатох виглєдованя з проєкту „Од сеґреґативней ґу интеґративней политики мултикултуралносци”, хтори потримала и Фондация за отворене дружтво, та о предкладаньох и препорукох за унапредзенє положеня националних меншинох и меншинских самоуправох хтори их представяю у обласци културней автономиї.
Як поведзене у наяви, циль Конференциї же би ше обновело розправу о политики мултикултуралносци у Сербиї, понеже слово о явней политики значней за шицких гражданох. Буду понукнути и одредзени ришеня хтори допринєшу моцнєню дружтвеней стабилносци, унапредзеню медзиетнїчних одношеньох, положеню националних меншинох, як и статусу националних совитох у правней и политичней системи.
Учашнїком на Конференциї буду бешедовц и високи представителє Влади Сербиї, других державних орґанох и европских институцийох, а на нєй будзе присуствовац и представитель Националного совиту Руснацох.