ВЕРБАС – На ютре, 28. новембра, у нововербаскей грекокатолїцкей парохиї св. Владимира будзе орґанизована вистава з нагоди 150-рочнїци народзеня митрополита Андрея Шептицкого.
Вистава фотоґрафийох и документох з назву „Живот и дїялносц митрополита України Андрея Шептицкого” у Вербаше будзе отворена на 12 г., а облапя архивски материял, приватни фотоґрафиї и малюнки на хторих представени церковна, медзинародно-дипломатска, просвитительска и спонзорска дїялносц митрополита Шептицкого.
Виставу у Сербиї орґанизує Амбасада України у Беоґрадзе, з потримовку грекокатолїцких парохийох у Сербиї, а попри у Вербаше, будзе виложена и у Кули, Индїї, Новим Садзе и Беоґрадзе.
На ютрейшей шветочносци з нагоди отвераня вистави наявени приход амбасадора України у Сербиї Олександра Александровича, нашого апостолского еґзарха, владики Георгия Джуджара, як и чолнїкох Општини Вербас.