За адаптованє простору и набавку новей кухнї значни средства опредзелєли локална самоуправа и иножемни донаторе, а нова кухня будзе мац и окремну комору за чуванє поживи яки вимагаю стандарди у тей обласци.
После адаптованя простору у будинку Червеного крижа у Шидзе, у цеку монтированє опреми за потреби Народней кухнї хтора тераз будзе у новим просторе. Як нам гварела Душица Полетан, нововибрана секретарка Червеного крижа, тераз ше монтира опрема хтора пренєшена зоз старого будинку, а тих дньох ма присц и сучасна опрема хтора ше намонтира.
– Под час селєня кухнї хасновательом нє даваме варени єдла, алє сухи и хлєб. То ше одноши як на хасновательох хтори особнє приходза по єдло, так и на гевтих хторим ми дому ношиме єдло. За адаптованє простору новей кухнї, значни средства опредзелєла локална самоуправа, а тиж и иножемни донаторе помогли за набавку опреми. У новей кухнї будземе мац и окремну комору за чуванє поживи як то вимагаю стандарди у тей обласци – гвари Душица Полетан.
Вона додава же у тей хвильки єст коло 350 хасновательох у Народней кухнї, алє нависцує же нєодлуга будзе зробена такволана ревизия хасновательох цо би мало значиц же можебуц дахто з потерашнїх хасновательох страци тото право, а дахто нови хтори, у потреби, тото право достанє.
Секретарка Полетан тиж наглашує же Червени криж и далєй водзи старосц о миґрантох хторих єст од 20 по 30 у прилапним центре у дакедишнєй старей клальнї у Шидзе. Волнтере Червеного крижу им одноша сухи єдла, я тиж им ше пририхтує юшки и чай. Слово о миґрантох хтори нє поднєсли вимоги за доставанє азилу, а свойо положенє дочасово реґуловали так же лєм виражели жаданє же можебуц буду питац азил.
Од активносцох хтори шлїдза, Полетанова визначує отримованє Скупштини Червеного крижу потим означованє Шветового дня добродзечних давательох креви, а у цеку юлия и авґуста буду отримани и акциї за добродзечних давательох креви.
– Тиж отримуєме и роботнї за превенцию тарґовини з людзми, а маме и роботнї психо-социялней потримовки. Тоти роботнї отримуєме вовторками през подобово роботнї, гвари Душица Полетан, хтора занята у Червеним крижу 18 роки, а на место секретарки пришла з позициї фаховей сотруднїци прето же потерашнї секретар Ивица Йович, меновани за помоцнїка предсидателя општини Шид.