АПОСТОЛСКИ ЕҐЗАРХАТ – У парохийох нашого Апостолского еґзархату хтори швета преславюю по юлиянским календаре нєшка Вельки пияток – дзень Исусовей шмерци на крижу.
Предходни Страсни тидзень ше закончує з богослуженьом Велького пиятку, кед ше рано служи Утриню з читаньом 12 Євангелийох, а пополадню Вечурню з покладаньом плащанїци до Божого гробу, як памятку на Исусово хованє. Вирни нєшка и на ютре, на Вельку соботу, годни поциловац плащанїцу и помодлїц ше при Божому гробу.
На Вельки пияток ше нє роби чежки роботи, строго ше посци у єдзеню, а по народних обичайох, ґаздинї того дня фарбя писанки.