Нєшка почина Драмски мемориял Петра Ризнича Дядї

автор зам
1.2k Опатрене

РУСКИ КЕРЕСТУР – З отвераньом вистави диґиталних роботох младей уметнїци Кристини Ґшвенґ з Вербасу нєшка, 15. априла, у Руским Керестуре почина 48. Драмски мемориял Петра Ризнича Дядї. Вистава поставена у голу на уходзе до Велькей сали Дому култури, а будзе отворена на 19,30 годзин.

Смотру театралней творчосци Руснацох у Сербиї, хтора тирва по 23. април,  на сцени Дому култури на 20 г. шветочно отворя заменїк предсидателя Општини Кула Велибор Милоїчич и наш визначни културни роботнїк, публициста и драмски аматер Дюра Латяк. Першу представу на Мемориялє – „Вона нєвиновата” Йовґена Кочиша, у режиї Михайла Зазуляка – одбави Руски народни театер (РНТ) „Петро Ризнич Дядя”.

На 48. Драмским мемориялє участвую єденац представи – седем за старших и штири дзецински – два спомнутого РНТ, два Драмского студия АРТ керестурского Дому култури, та по єдна Заводу за културу войводянских Руснацох, Културного центру Кула, КУД „Яким Гарди” з Петровцох, Руского културного центру Нови Сад, КПД „ДОК” з Коцура, КУД „Тарас Шевченко” з Дюрдьова и Руского КУД „Др Гавриїл Костельник” з Кули.

Шицки представи буду у Велькей сали Дому култури, за дзеци буду од пондзелку, 18., та по штварток, 21. априла и починаю на 13 г., а вечарши представи на 20 г. Представи за старших нє будзе на пондзелок и вовторок.

Як и прешлого року, дзецински представи орґанизовано буду патриц и школяре з наших местох дзе маме порядну, лєбо виборну наставу по руски, а їх приход орґанизує Одбор за образованє Националного совиту Руснацох.

У представох за старших жири публики, у хторим векшином новинаре з наших медийох, наградзи ґлумца за найлєпше одбавену улогу у єдней представи.

На ютре, на соботу, на Драмским мемориялє участвує Младежска ґрупа Драмского студия АРТ Дому култури Руски Керестур, хтора одбави представу „Сезона лову на ловара” Олександра Витера, у режиї Владимира Надя Ачима.

ПОВЯЗАНИ ТЕКСТИ