РУСКИ КЕРЕСТУР – У Руским Керестуре нєшка, 28. марца, у просторийох Дому култури Руски Керестур на 10 годзин будзе порядна, штварта схадзка Националного совиту (НС) Руснацох у тим зволаню.
На дньовим шоре 29 точки, медзи нїма финансийни звит и звит о роботи НС за прешли, як и план и финансийни план Совиту за тот рок. Члени НС нєшка буду розпатрац и звити и плани роботи установох хторим Совит снователь, лєбо соснователь – НВУ „Руске слово”, Заводу за културу войводянских Руснцох и РНТ „Петро Ризнич Дядя”.
На нєшкайшей схадзки би мал буц вименєни Статут НС, принєшана одлука о формованю Пододбору за управу и предписаня и вибор його членох, а мал би буц вибрани и по єден член до Одбору за службене хаснованє язика и писма и до Роботного цела за младеж.
На схадзки предвидзене приношенє одлукох вязаних за подручни канцелариї НС – о пременки шедзиска Подручней канцелариї у Сримскей Митровици, та о менованю координаторох и членох шицких подручних канцеларийох по наших местох, задлужених за одредзени обласци.
На дньовим шоре и потвердзованє одлукох Вивершного одбору НС о опредзелєних средствох нашим орґанизацийом и установом на основи конкурсох Покраїнского секретарияту за културу и явне информованє и о даваню думаньох о кандидатох за директорох школох у Новим Садзе и Савиним Селу.
На нєшкайше схадзки би мала буц принєшена и одлука о местох отримованя централних преславох Националного швета Руснацох од 2016. по 2018. рок, Одлука о вименки Правилнїку о хаснованю службеного авта НС, та о додзельованю двох позарядових стипендийох школярком рускей Ґимназиї у Керестуре. На схадзки будзе дата и информация о можлївосцох розполаганя з квартельом НС у Новим Садзе.