СЕРБИЯ – Вчера у Сербиї урядово почал упис дзецох до першей класи основней школи, а тирва по конєц мая, сообщело Министерство просвити. До школского 2015/16. року ше уписує дзеци народзени од марца 2008. по марец 2009. року. Дзецко може рушиц до школи и рок скорей, алє аж после преверйованя о тим чи є порихтане за школу.
Родичи, лєбо старателє, на упису треба же би придали кресцене писмо, потвердзенє о месту пребуваня, потвердзенє же дзецко ходзело до предшколскей установи, односно же звладало предшколску програму. За дзеци потребни и систематски препатрунок и потвердзенє од лїкара же су способни за школу и же су вакциновани.
Як поведзене з Министерства просвити, дзеци з чувствительних дружтвених ґрупох спомнуту документацию нє муша мац за упис до першей класи ОШ.
По податкох о числу народзених дзецох у тим периодзе, обчекує ше же у новим школским року будзе 2 500 вецей дзеци як на прешлорочним упису.