НОВИ САД – Одборнїки Скупштини городу Нови Сад стреду, 21. октобра, принєсли одлуки о тогорочних добитнїкох городских припознаньох. Добитнїки Октоберскей награди ЯКП „Городске желєнїдло”, Коло сербских шестрох епархиї Бачкей и културни роботнїк Исмет Атич.
На Скупштини городу одлучене же Новемберску грамоту достаню Стефан Веля, матурант Ґимназиї „Йован Йованович Змай” – наймладши добитнїк златней медалї з медицини на Шветовим салонє пренаходкох, виглєдованя и нових технолоґийох „Еурека” 2014. року у Бриселу, директор Городскей библиотеки Драґан Коїч и гуманиста Ґоран Црноєвич.
Октоберску награду ше додзелює з нагоди 23. октобра, Дня ошлєбодзеня Нового Саду у Другей шветовей войни, а Новемберску грамоту з нагоди означованя 9. новембра 1918. року – Дня ошлєбодзеня Нового Саду у Першей шветовей войни, як и з нагоди 25. новембра, кеди на Велькей народней скупштини 1918. року принєшена одлука о соєдинєню Войводини ґу Кральовини Сербиї. Награди добитнїком буду уручени на окремней шветочносци.