КУЛА – Контракти о додзельованю пенєжних средствох з буджету Општини Кула, за нєвладово орґанизациї, здруженя гражданох у обласци защити од огня, 13. юлия подписал предсидатель Општини Дамян Милянич.
Општина Кула за тоту намену опредзелєла 1.500.000 динари, а розпоредзени су – 600.000 динари ДОД-у Руски Керестур, 400.000 ДОД -у Кула, ДОД-у Сивец сума 250.000 динари, ДОД-у Червинка 150.000 и Општинскому огньогасному союзу – 100.000 динари.
Предсидатель Милянич визначел же средства по конкурсу тим дружтвом з рока на рок векши, а так ше и предлужи, а схадзка вихаснована побешедовац и о тим як найсц способ ище вецей помогнуц тим барз важним дружтвом, а хтори функционую без стаємней помоци держави.
Предсидатель ДОД Руски Керестур, Михайло Рац, наглашел же достати пенєж будзе похасновани на розвой огньогацства у тим валалє и визначел же таки вельки средства Дружтво потераз нїґда нє достало.
