НОВИ САД – З кладзеньом венцох на памятнїк „Фамелия“ и спущованьом венцох до Дунаю, пригоднима бешедами и панахидами, вчера означена 73-рочнїца Новосадскей рациї, у хторей страдали 1 200 Новосаднянє.
На тим урядовим означованю присуствовали делеґациї Городу Нови Сад, Влади Републики Сербиї, амбасадор Израїлу, представителє Амбасади Мадярскей, Єврейскей општини, Союзу єврейских општинох Сербиї, та представителє потомкох жертвох Рациї.
Городоначалнїк Нового Саду Милош Вучевич гварел же нас тота траґична подїя ма здогаднуц на значносц почитованя и уважованя медзиетнїчней и вирскей толеранциї.
– Новосадски Голокауст опомина до якей траґедиї може привесц нецерпезлївосц спрам другей нациї и вири. Тот найцмейши бок историї нашого городу нїґда нє забудземе, вона нас обовязує же бизме нашим потомком усадзели идею мира, же би ше тоти страшни часи вецей нє повторели – гварел Вучевич на комеморациї.