БЕОҐРАД – Вчера означена 12-рочнїца забойства першого демократски вибраного премиєра и предсидателя Демократскей странки (ДС) Зорана Дїндїча. З кладзеньом квеца и венцох на гроб на теметове и спомин-плочу у дворе Влади Сербиї, фамелия, його симпатизере, терашнї и бувши члени ДС, министрове, на чолє з терашнїм премиєром Александром Вучичом, як и велї други политичаре здогадли ше на покойного Дїндїча.
На чолє колони ДС, хтора на теметов рушела коло 11 годзин, були єй предсидатель Боян Пайтич, Драґан Шутановац, Ґордана Чомич, Наташа Вучкович и Борислав Стефанович и други функционере странки. З тей нагоди Пайтич виявел же дума же Зоран Дїндїч єдини реформатор од уводзеня вецейстранковей системи у Сербиї, преноши Танюґ.
Окрем кладзеня квецох на гроб покойного Дїндїча, вчера отримане и финалне змаганє младих у бешеднїцтве „Бешеди Зоранови на чесц“ з тему „Живот то тото цо з нього направиме. И Сербия то тото цо з нєй направиме“.
По забойстве предсидателя Влади Зорана Дїндїча 2003. року у Сербиї преглашени позарядови стан, порушана акция „Шабля“. За забойство осудзени члени „земунского клану“, док ище вше нє познате хто бул инициятор атентату.
