КУЛА – Стреду, 6. мая, делеґация Националного совиту (НС) чарногорскей националней меншини у Сербиї нащивела Општину Кула, дзе бешедоване о преширйованю сотруднїцтва на планє очуваня идентитету тей меншини у кулскей општини. Як Чарногорци у општини ше вияшнєли вецей як 4 500 гражданє, котри з найвекшей часци жию у Крущичу, Сивцу, Червинки и у Кули.
У делеґациї НС Чарногорцох були заменїк предсидателя Совиту Бранислав Секулич, подпредсидатель Совиту Слободан Баланджич и заменїк предсидателя Вивершного одбору Совиту Ненад Влахович, а бешедовали з предсидательом Општини Кула Драґаном Трифуновичом и його заменїком Велибором Милоїчичом.
У розгварки виражене задовольство обидвох бокох пре витворйованє сотруднїцтва, як и пре порихтаносц Општини же би потримала шицки активносци НС Чарногорцох. У складзе зоз Законом, Општина Кула финансує три найвекши национални заєднїци у своєй општини, односно їх национални совиту, медзи нїма и чарногорски, гварене на сходзе.
Як винєшене, за роботу трох националних совитох у општинским буджету опредзелєни по 250 000 динари. Чолнїки Општини гварели же финансийно потримаю и дзепоєдни проєкти НС Чарногорцох, у складзе зоз своїма можлївосцами, а розпатране и питанє преславйованя 13. юлия у кулскей општини, як и означованя 70-рочнїци колонизованя Чарногорцох до Войводини.