КУЛА – Општину Кула вчера нащивел подпредсидатель Покраїнскей влади и покраїнски секретар за образованє, предписаня, управу и национални меншини-заєднїци Михаль Нїлаш, дзе ше стретнул з представителями локалней самоуправи и з членми Активу директорох основних и штреднїх школох и предшколскей установи у кулскей општини.
После роботних схадзкох, секретар Михаль Нїлаш и заменїк предсидателя Општини Кула Велибор Милоїчич за медиї визначели винїмково добре сотруднїцтво Секретарияту и локалней самоуправи, о чим шведоча и 18 милиони динари за прешли и тот рок, хтори Секретарият унапрямел за проєкти у 12 образовних установох у општини, а участвує и у финансованю превозу штредньошколцох.
Милоїчич наглашел же на роботней схадзки зоз секретаром бешедоване о вецей важних питаньох, хтори буду у наступним периодзе буду вєдно ришовац.
По словох подпредсидателя Покраїнскей влади и покраїнсклого секретара Нїлаша, у розгваркох констатоване же Општина Кула вельо уклада до отримованя обєктох, дзе компетенциї Покраїни барз мали, а у наступним року у тей обласци вєдно жадаю започац вчера догварени пременки.
Покраїнски секретар похвалєл и вельки досяги у обласци двоязичного образованя у кулскей општини, хтори служа як приклад, понеже ше настава одвива на руским и мадярским язику, а наглашел же у тим школским року жадаю витвориц уводзенє мадярского язик як виборного предмету у ОШ у Сивцу.
На схадзки Михаля Нїлаша з членми Активу директорох школох, накратко представени образовни установи, а керестурску Основну и штредню школоу з домом школярох „Петро Кузмяк” представела єй директорка Хелена Пашо Павлович.
У вияви за „Рутенпрес” Пашо Павловичова з тей нагоди окреме наглашела же чуванє основней школи лєм з руским наставним язиком далєкосяжно барз важне за очуванє нашого руского идентитета, а тиж и ґимазиї на руским язику, єдинственей на швеце.
Михаль Нїлаш вчера у Кули нащивел и два школи – штредню Економско-тарґовецку и ОШ „Петефи бриґада”.
