КУЛА – У просторийох Руского КУД „Др Гавриїл Костельник” у Кули вовторок, 23. юния отримана друга схадзка Орґанизацийного одбору за отримованє Централней шветочносци Националного швета Руснацох Сербиї, у Кули 2016. року. На схадзки присуствовали представителє кулского КУД, директор Заводу за културу войводянских Руснацох мр Серґей Тамаш, заменїк предсидателя Националного совиту Руснацох Йовґен Мудри, директорка Школи за основне музичне образованє (ШОМО) у Кули Лїляна Барна Никитович, та други заинтересовани.
На схадзки бешедоване и о написох у вязи з дотерашнїма централнима означованями нашого швета и, як поведзене, Орґанизацийни одбор отворени за конкретни суґестиї хтори можу подзвигнуц уровень шветочносци.
Орґанизацийни одбор завжал становиско же ше концепцию за наступну Шветочносц нє будзе меняц, же би ше таку форму означованя запровадзело и у Суботици и Бачинцох, а предложене же би ше тот час вихасновало за обдумйованє новей концепциї означованя Националного швета Руснацох.
Директорка ШОМО Лїляна Барна Никитович и наставнїца у тей школи Тат’яна Кнежевич прилапели обдумац музични часци потребни за провадзаци активносци Централней шветочносци у Кули, як цо отверанє вистави и промоция моноґрафиї.
Александер Мудри поинформовал присутних о снованю редакциї за писанє моноґрафиї Руснаци у Кули, а Владимир Лазор иницировал отримованє шаховского турниру.
Як порадзене, идуца схадзка Орґанизацийного одбору будзе 28. юлия (на 18 г.) у просторийох КУД ,,Др Гавриїл Костельник”. Схадзка отворена за явносц, та у роботи Одбору можу участвовац шицки заинтересовани.