ШИД – У Лєтнєй владическей резиденциї вчера, на перши дзень нового рока по юлиянским календаре, по традициї отримана Рочна схадзка парохийней заєднїци, на хотрей спатрена робота у прешлим и цо би требало поробиц у чечуцим року.
Парох о. Михайло Режак обсяжно начишлєл шицки активносци у прешлих 12 мешацох, а з инвестицийних планох у тим року визначени початок роботох на малтерованю мурику опрез Резиденциї и санироване дражки ґу церкви.
Касир Владимир Торма винєсол финансийни звит, а о активносцох Старших шестрох бешедовала Нада Остоїч.
Вирни прилапели спомнути звити, а як то по традициї на тот дзень, обновели свойо места-столїки у церкви хтори хасновали прешлого року.
