СРИМСКА МИТРОВИЦА – У Парохиялней сали Парохиї Вознесеня Господнього вчера вечар отримана традицийна Културна манифестация „Мацери Рускинї“ хторе орґанизовало Здруженє гражданох „Руснаци“ з потримовку парохиї.
Домашнї Хор „Руски зарї“ ше представел зоз даскелїма рускима народнима шпиванками у провадзеню оркестра „Ходоба и приятелє“.
Госци на програми були члени КУД „Яким Ґовля“ зоз Миклошевцох хтори ше представели зоз танцами наймладших членох Дружтва, потим танцовали и старши танєчнїки, а удатни наступ мала и Женска шпивацка ґрупа хтора ше представела зоз венчиком руских народних шпиванкох.
Окрем домашнього пароха о. Владислава Варґи, шицких привитали и Борислав Сакач, предсидатель Националного совиту Руснацох и Никола Ляхович, предсидатель Националного совиту Українцох.
На концу домашнї парохиянє одшпивали коляди „Бог предвични“ и „Христос родився“, а госци з Миклошевцох коляду „Пречистая Дїва“.
Програму провадзели и госци зоз парохиї Преображеня Господнього зоз Шиду на чолє зоз парохом о. Михайлом Режаком, хтори пред тим бул парох у Сримскей Митровици.
