Отримани „Днї толеранциї Шайкашскей”

автор л. виславски
468 Опатрене

ДЮРДЬОВ – У орґанизациї Здруженя женох „Олория” з Дюрдьова прешлого тижня у просторийох Месней заєднїци отримана манифестация „Днї толеранциї Шайкашскей”, з нагоди 10-рочнїци иснованя того Здруженя.

У програми участвовали шпивацка ґрупа „Василис” з Дюрдьова, поета ЯкимЧапко и Мария Сеґеди представели свойо твори на руским язику, Верица Варґа зоз Локу одрецитовала даскельо свойо писнї на сербским язику. На програми бул присутни и Хор „Пасторала” зоз Жаблю, з котрим Здруженє порядно сотрудзує. Зоз свою гумористичну програму на сербским язику наступела Лїла Цвиянович – Колбас.

Предсидателька Здруженя Леона Виславски виложела стари фотоґрафиї котри настали од 1900-1957. рок, а на котрих приказани обичаї, каждодньови живот и облєчива у Войводини.

На манифестациї були присутни представителє орґанизацийох зоз иножемства зоз Польскей, Словацкей и Израїлу, та ше з нїма догваряло о дальшим сотруднїцтву.

Отримованє тей манифестациї помогнул Покраїнски секретарият за образованє, предписаня, управу и национални меншини-национални заєднїци.

ПОВЯЗАНИ ТЕКСТИ