НОВИ САД – Опрез памятнїка Тарасови Шевченкови у Новим Садзе вчера отримани сход потримовки гражданом України котрих залапели воєни зраженя. Сход орґанизовала коалиция нєвладових орґанизацийох Гражданска Войводина.
На сходзе бешедовали представнїк коалициї Дарко Шпер и Оливера Радованович, и представнїк українскей заєднїци Мирослав Хочак.
Бешеднїки найоштрейше осудзели аґресию Русиї на Україну и поволали гражданох Войводини и Сербиї же би були солидарни зоз українску заєднїцу у Войводини, алє и зоз гражданами Русиї котри протествую процив войни а прецо церпя вимсценя.
Хочек визначел же уж вецей як милион и пол вибеженцох напущело Україну и поволал шицких гражданох же би ше одволали на гуманитарни акциї и так помогли людзом котри охабели свойо обисца.
Коалиция Гражданска Войводина видала и урядове сообщенє, а творя ю Центер за реґионализем, Гражданска акция Панчево, Желєна мрежа Войводини, Хелсински одбор за людски права у Сербиї, Войводянски граждански центер, Центер гражданских активносцох Суботица, Нєзависне дружтво новинарох Войводини и Центер за интеркултурну комуникацию.
