РУСКИ КЕРЕСТУР – На предкладанє Вивершного одбору (ВО) Националного совиту (НС) Руснацох, скорей основане Роботне цело за управу и предписаня тераз формоване як Пододбор у рамикох Одбору за службене хаснованє язика и писма, так же на штвартей схадзки 28. марца, НС Руснацох вименєл свой Статут у члену хтори ше одноши на бувше Роботне цело. З тим, попри одборох, НС ма три роботни цела – за младеж, за спорт и за науку.
Орґанизацийна пременка окончена пре лєпше розподзельованє средствох у рамикох Одбору за службене хаснованє язика и писма, понеже попри спомнутого, вон ма и Пододбор за демоґрафию. Пододбор за управу и предписаня ма предсидателя и 4 членох, а шицки одлуки, заключеня и предкладаня пододборох верификує Одбор за службене хаснованє язика и писма.
На остатнєй схадзки Совиту до тедишнього Роботного цела були меновани Мирослав Кевежди з Нового Саду и Мирослав Цирба зоз Шиду, та на писмено дате предкладанє инициятора формованя того цела – члена НС Кевеждия, на всоботу отриманей схадзки до терашнього Пододбору Совит єдногласно меновал ище Йоакима Гардия з Керестура, Ивану Отич з Нового Саду и Тамару Рамач з Дюрдьова. ВО НС до того цела предкладал и Боґдана Виславския з Дюрдьова, цо на схадзки Совиту нє прилапене, алє випочитоване предкладанє Мирослава Кевеждия.
Боґдан Виславски вибрани до Одбору НС за службене хаснованє язика и писма, задлуженого за жабельску општину. Вибор Виславския з 10 гласами „за”, трома „процив” и трома „стриманима” до того одбору ушлїдзел понеже на самей схадзки кандидатуру поцагнул член Совиту Мирон Сабадош и предложел Виславския. Сабадоша за члена спомнутого Одбору предкладал ВО НС.
На предкладанє Роботного цела за младеж же би ше го преширело за єдного члена, на соботовей схадзки перше принєшена Одлука же Роботне цело за младеж ма 13 членох, а потим за нового члена єдногласно вибрани Борис Бесерминї з Нового Орахова.