ВОЙВОДИНА – Гоч биланс єшеньскей шатви у Войводини будзе познати самим концом рока, док буду позберани податки зоз шицких катастерских општинох, уж тераз мож повесц же под житом зашати менєй поверхносци як влонї, оценюю фаховци, а преноша нашо медиї.
На зменшанє продукциї жита уплївовали вельо дижджовни днї у периодзе оптималного термину за шатву, алє, и попри барз доброго тогорочного роду жита, и менша заинтересованосц польопривреднїкох за жито пре нїзку одкупну цену.
Як гваря фаховци, оптимални термин за шатву жита вишол у октобру, а шатва у новембру вимагала вецей нашеня.
На польох дзе жито пошате у нормалним чаше воно добре напредує и тераз є у фази розрастаня (бокореня) з двома-трома лїсточками.