РУСКИ КЕРЕСТУР – Полицайки з полицийних станїцох у Зомборе и Кули вовторок, 29. септембра, нащивели дзеци у керестурскей дзецинскей заградки „Цицибан” ПУ „Бамби” з Кули, у рамикох општинского проєкту „Полицай и я – товарише од оводи”, хторому циль унапредзиц безпечносц и защиту дзецох и школярох.
Дзецом з двох предшколских ґрупох полицайки през друженє потолковали шицки сучасни и актуални гроженя їх безпечносци у транспорту и у других ситуацийох на улїци, або у обисцу – од тарґовини з людзми по педофилию.
Полицайки дзеци упознали и зоз свою професию и подзелєли им лакотки и кнїжочки за вифарбйованє на теми о хторих з нїма бешедовали.
Проєкт „Полицай и я – товарише од оводи” вовторок закончени з подобну нащиву дзецинскей заградки у Липару, а Полицийна управа Зомбор, з потримовку МУП Републики Сербиї и Мисиї ОЄБС-у у Сербиї, го витворела у 25 предшколских дзецинских ґрупох у 11 дзецинских заградкох у шицких местох кулскей општини.
По 5. октобер отворени и подобови конкурс з тему проєкту, а у його другей часци дзеци нащивя полицийну станїцу у Кули, одн. локални полицийни оддзелєня у своїх местох.