КУЛА – Звити о роботи и финансийох у прешлим, та план роботи за тот рок, були главни точки на порядней рочней Скупштини Руского Културно-уметнїцкого дружтва (РКУД) „Др Гавриїл Костельник” у Кули, хтора у просторийох Дружтва отримана всоботу, 24. януара.
Присутних привитал предсидатель РКУД Владимир Бучко, медзи нїма и предсидателя Вивершного одбору Националного совиту (НС) Руснацох Желька Ковача, а Скупштину водзел предшедаваюци Роботного предсидательства Янко Такач. У звиту о роботи Бучко визначел 13 програмни активносци членох РКУД у прешлим року, медзи нїма и госцованя Мишаней шпивацкей ґрупи и монодрами вецейраз у Руским Керестуре, та у Вербаше, Коцуре и Шидзе, участвованє на Општинскей и Зонскей смотри музично-фолклорней творчосци, на Фестивалє „Най ше нє забудзе” у Дюрдьове, на дзечоєдних програмох у Кули, як и орґанизованє Стретнуца рецитаторох у рамикох „Костельниковей єшенї”.
У нашим КУД у Кули ше и прешлого року сходзели жени на рекреативни вежби, а у просторийох Дружтва ше порядно сходза и члени Здруженя женог „Идея”, хторе у марцу означи рок своєй роботи, о чим бешедовал Янко Такач.
Програмни активносци у тим року буду подобни як и прешлорочни, алє новосц же тих дньох знова почнє пририхтованє дзецинскей представи, тераз з младу режисерку з Вербасу Александру Лендєр, будзе обновена робота Рецитаторскей секциї, хтору будзе водзиц Амалия Ковач, розпатра ше и снованє Шаховскей секциї за дзеци, а з Мишану шпивацку ґрупу предлужи робиц Еуфемия Планкош з Керестура. Єдно зоз заключеньох на Скупштини и же би Завод за културу войводянских Руснацох поряднє финансовал роботу фахових сотруднїкох у наших КУД, та и кулским.
Понеже у януаре 2016. року Централну преславу Националного швета Руснацох плановане отримац у Кули, на Скупштини бешедоване и о одредзених пририхтуюцих роботох, насампредз о уключованю цо векшого числа Руснацох у Кули до пририхтованьох за тоту подїю, уключованю членох РКУД до будуцого Орґанизацийного одбору, о розгваркох з локалну заєднїцу на тоту тему, як и же би ше у пририхтованьох за Централну преславу глєдало помоц од установох и институцийох у Руским Керестуре.
Спрам финансийного звиту, хтори на схадзки винєсол Янко Такач, кулске РКУД прешлого року розполагало зоз прейґ 670 000 динари, достатих од НС Руснацох, Општини Кула, Заводу за културу войводянских Руснацох, а скоро половка були пренєшени средства з 2013. року. До 2015. року пренєшени прейґ 300 000 динари.
