Почал Вельки тидзень

автор мст
1.1k Опатрене

РУСКИ КЕРЕСТУР – У керестурскей парохиї вчера почал Вельки, лєбо Страсни тидзень пред Вельку ноцу, а вечарши Богослуженя у Катедралним храме буду на 19 годзин. На Желєни штварток  на 19 г. будзе Вечурня з Василийову Службу Божу, з обрядом умиваня ногох.

Богослуженє на Желєни штварток, на дзень кед ше преглїбює початок Христово страданя пред шмерцу на крижу, будзе предводзиц наш преосвящени владика Георгий Джуджар. Исти дзень, на пол дзевятей рано священїки почню споведац хори и стари особи по їх обисцох.

Понеже того року перши пияток пада на Вельки пияток, Святи Тайни буду виложени на штварток у Новим манастире, на 8,30 годзин. Служба Божа того дня будзе лєм на вечар, а на Вельки Пияток строги пост.

На 8 годзин будзе Утриня з читаньом 12 Страсних Євангелийох, на 15 годзин Вечурня з покладаньом плащанїци до гробу, хтору вирни годни циловац до соботи вечара.

Парох о. Михайло Малацко окреме модли родичох, младих и дзеци же би вихасновали тоту нагоду и на таки способ висловели сочувствиє и солидарносц з розпятим Исусом. На Вельки пияток почнє и Дзевятинїца до Божого милосердия.

На Вельку собота на 8 годзин будзе Єрусалимска Утриня пред Христовим гробом, а на 20 г. Пасхалне бдиниє – Всеночне з Воскресну утриню.

 

 

ПОВЯЗАНИ ТЕКСТИ