СВИДНЇК (СЛОВАЦКА) – У Свиднїку, у Словацкей, нєшка почина 61. Швето култури Русинох-Українцох Словацкей Републики, у орґанизациї Союзу Русинох-Українцох Словацкей. Фестивал тирва по нєдзелю, 21. юния.
Познате Швето култури нєшка почнє з литературнима и театралнима змистами, та наступом домашнїх ансамблох, а на ютре у свиднїцким амфитеатре наступя перше дзецински ґрупи, а потим домашнї и ансамбли з иножемства. Часц ютрейшей програми пошвецени и творчосци познатей шпивачки Мариї Мачошковей, а участвує и шпивачка з України София Федина.
Закончуюца програма Швета култури почнє на нєдзелю пополадню, тиж з наступом домашнїх и госцуюцих ансамблох, а зоз Словацкей на Фестивалу наступя ансамбли „Маковица”, .Карпатянин”, „Старишан”, „Шаришан”, „Словинка”, „Єдлинка”, „Куровчан”, „Маґура” и ПУЛС.
З иножемства участвую ансамбли з України, Горватскей и КУД „Жатва” з Коцура, зоз Сербиї.