КУЛА – Општинска рада (ОР) Кула вчера утвердзела Нарис одлуки о висини стопи порциї на маєток у кулскей општини, а явна розправа о Нарису тей одлуки тирва по 23. новембер. Текст Нарису мож видзиц на сайту Општини Кула – www.kula.rs/javni-uvid, а свойо (написани) пригварки и суґестиї шицки заинтересовани гражданє можу придац на адресу: Служба Скупштини општини Кула, лєбо Општинска рада Кула, Ленїнова 11, Кула.
ОР вчера принєсла и Заключенє о даваню согласносци на ребаланси финансийних планох месних заєднїцох у Кули и Крущичу, як и же почню роботи на реконструованю фекалних станїцох у Кули, та реконструованю построєньох за дезинфикованє води у шицких местох општини.
Спомнути роботи-проєкти буду витворени зоз средствох достатих на конкурсу Покраїнского секретарияту за польопривреду, водопривреду и лєсарство, а з часцу средствох участвує и Општина Кула.