СРИМ – У шицких штирох церквох у шидскей општини вчера на Квитну нєдзелю служени Служби Божо з традицийним пошвецаньом багнїткох.
У Шидзе о значносци спомнутого швета на богослуженю наказовал парох о. Михайло Режак, котри гварел же багнїтки, як християнски символ, треба у обисцу тримац коло образа и на видним (прикладним) месце.
У Бачинцох Службу Божу служел парох о. Дарко Рац, а у Беркасове и Бикичу парох о. Владимир Еделински Миколка.
У Бачинцох на 9 г. була Вельконоцна споведз, потим о. Дарко Рац пошвецел багнїтки, а по Служби Божей, парох бачински споведал хорих и нємоцних у їх обисцох.
У шицких церквох на службох було вецей християнох як звичайно на нєдзельових богослуженьох.
