КОЦУР – Прешлого тижня о. Здравко Йованович меновани за пароха православней церкви Успения пресвятей Богородици у Коцуре и будзе жиц у валалє. Нови паноцец внєдзелю ту отримал свою першу Службу Божу.
То перши раз же православна церква у Коцуре ма стаємного пароха, бо нєдзелями служби служел священїк з Вербасу. После вимогох хтори парохиянє и руководительство коцурскей православней парохиї на вецей заводи посилали до висших орґанох тей церкви, священїк пришол до Коцура.
О. Йованович, котри до Коцура премесцени з Новей Вароши, будзе бивац у хижи хтору церкви на безплатне хаснованє подаровал парохиян Радослав Салатич. Ма обезпечени и шицки условия за роботу, понеже нова церква и помоцни просториї коло нєй докончени.