РУСКИ КЕРЕСТУР – У Велькей виронаучней сали парохиї св. Оца Миколая у Руским Керестуре, всоботу 14. новембра, парохийни Каритас з традицийним Вечаром приятельох Каритасу представел свою єднорочну роботу.
З рижнородну програму волонтере велькому числу присутних госцох наглашели найглавнєйши активносци у тим року, а визначени зберанє помоци за Україну, як и шицки други акциї на збераню и даваню помоци фамелийом и особом у валалє котрим то потребне – поживи, облєчива, огриви.
И того року у Каритасу отримовани порядни стретнуца и друженя з дзецми, младима и старима, а наявени и початок роботи Телефонски центру за слуханє Нїтка – проєкт на уровню нашого еґзархатского Каритасу.
На Вечару приятельох Каритасу поєдинцом и орґанизацийом котри помагаю його роботу представени и финансийни звит, дзе приходи були 598 000 динари, а розходи 550 420.
Коло сто трицец присутним на Вечаре приятельох Каритасу о природи християнского дарованя и милосердносци бешедовал парох керестурски о. Михайло Малацко, а после програми за шицких пририхтани скромни коктел.
