НОВИ САД – Вчера у просторийох Руского културного центру (РКЦ) у Новим Садзе премиєрно одбавена бабкарска представа „Медведзова женїдба”, по тексту Десанки Максимович.
Квалитетни текст Десанки Максимович, хтори прешпивал Микола Скубан, а адаптовала Мелания Римар, по форми и мотивох прилагодзени нєшкайшому часу, цалком бул розумлїви публики, хтора з полну увагу провадзела представу.
З удатно укомпонованима улогами ґлумцох и бабкох, ефектно приказани збуваня у лєше, кед медведз себе глєда жену. Наставнїца Оля Яковлєв ше указала як добра режисерка, та мали ґлумци, котри мали и ґлумецки и бабкарски улоги, цали час тримали увагу публики. Оля Яковлєв пририхтала и сценоґрафию, бабки и костими, а музику компоновал Мирослав Пап.
У дзецинским ансамблу РКЦ ґлумя дзеци котри виучую руски язик у вецей новосадских школох – Лена Яковлєв вивирку, Марина Грубеня була наратор, Лука Вуячич ґлуми вовка, Михаило Пап дал глас медведзови, Фиона Грубеня ґлумела медведжицу Гену, Николина Миячич лїшку, а Альоша Дюранїн ґлумел заяца.
З тоту представу Новосадянє наступя и на Драмским мемориялє у Руским Керестуре на вовторок, 21. априла.
