НОВИ САД – На 56. схадзки Управного одбору (УО) Новинско-видавательней установи (НВУ) „Руске слово” з Нового Саду, хтора отримана вчера, 27 новембра у просторийох Установи, прилапена вименка финансийного плану НВУ за 2015. рок, так же место 42 милиони 831 000 динари, вон тераз виноши 43 милиони 257 000 динари.
Прилапени и План роботи НВУ „Руске слово” и Финансийни план за 2016. рок, по хторим цалосни буджет плановани на 41 милион 190 000 динари, як и информация о усоглашованю Одлуки о снованю НВУ „Руске слово” зоз Законом о явним информованю и медийох. О спомнутих документох будзе ше одлучовац на наступней схадзки Националного совиту Руснацох.
По прилапеним Плану роботи, „Руске слово” у идуцим року окремну увагу пошвеци лєпшому пласованю шицких виданьох: новинох, часописох и кнїжкох и їх векшей доступносци читачом шицких ґенерацийох. У тим напряме буду орґанизовани промоциї у местох дзе жию Руснаци, наградни конкурси и други активносци хтори у функциї мисиї хтору окончує Установа – очуванє националного єства Руснацох, як и активносци хтори маю комерциялни потенциял.
На схадзки предложене же би промоциї були орґанизовани у сотруднїцтве з програмами на руским язику Явней медийней установи Радио-телевизиї Войводини.
На вчерайшей схадзки, хтору водзела заменїца предсидателя УО Златица Няради, заключене же з потримовку снователя – Националного совиту Руснацох, треба обезпечиц найвигоднейши простор за роботу Установи у Новим Садзе и у Руским Керестуре.