НОВИ САД – Роботне цело за науку Националного совиту (НС) Руснацох почало пририхтованє за отримованє Округлого столу о Националней стратеґиї Руснацох у Сербиї по 2020. рок, дознава Рутенпрес од члена Роботного цела, академика Юлияна Тамаша.
У Заводзе за културу войводянских Руснацох штварток, 17. марца, отримана схадзка Роботней ґрупи (основаней при Роботним целу за науку) за пририхтованє Округлого столу о Стратеґиї Руснацох по 2020. рок и Поглавю 23 у прегваркох Сербиї о приключованю ґу Европскей униї.
Заключене же би за спомнути округли стол предсидателє одборох НС за културу и образованє, Роботного цела за науку, як и представитель Покраїнского омбудсмана, пририхтали уводни викладаня за розправу.
Як Рутенпрес поинформовал др Тамаш, з резултатами и заключенями з розправи будзе дополнєна Националней стратеґиї Руснацох, як и з практичнима предкладанями за єй применьованє. Тиж будзе формуловане и становиско НС Руснацох о Поглавю 23.
Як плановане, Округли стол о Националней стратеґиї Руснацох по 2020. рок и Поглавю 23 би мал буц отримани у другей половки априла.